(ରଜନୀକାନ୍ତ ପାତ୍ର)ହିଞ୍ଜିଳିକାଟୁ : ଗଞ୍ଜାମ ଜିଲ୍ଲା ଅଞ୍ଚଳର ଦୁର୍ଦ୍ଦାନ୍ତ ଅପରାଧି ଶିବା ସେଠୀ ସହ ତା ଗ୍ୟାଙ୍ଗର ସମସ୍ତ ଅପରାଧୀ ଗିରଫ । ସେମାନେ ଏକ ଲୁଟ୍ ପାଇଁ ଯୋଜନା କରୁଥିଲେ । ଏ ସମ୍ପର୍କରେ ପୋଲିସ ସୂଚନା ପାଇ ଚଢ଼ାଉ କରିଥିଲା । ଶିବା ଓ ତା ସହଯୋଗୀ ପୋଲିସକୁ ଦେଖି ଦଉଡ଼ି ଯାଇ ଗୁଳି ଓ ବୋମା ମାରିଥିଲେ । ପରେ ପୋଲିସ ୯ଜଣ ଅପରାଧୀଙ୍କୁ ଗିରଫ କରି ଆଜି କୋର୍ଟ ଚାଲାଣ କରିଛି । ଅପରାଧିଙ୍କ ନିକଟରୁ ମୋବାଇଲ୍, ମାରଣାସ୍ତ୍ର, ବନ୍ଧୁକ ଓ ଗୁଳି ଜବତ କରିଛି ।ଦୁର୍ଦ୍ଦାନ୍ତ ଅପରାଧୀ ଶିବା ସେଠୀ ନାରେ ରହିଛି ଲୁଟ୍, ରାହାଜାନୀ ଓ ବଟି ଆଦାୟ ପରି ଅନେକ ସଙ୍ଗୀନ ମାମଲା ।
ସୂଚନାଅନୁଯାୟୀ ଶିବା ଓ ତାଙ୍କ ଗ୍ୟାଙ୍ଗ୍ ଗତ କିଛି ଦିନ ଧରି ନରେନ୍ଦ୍ରପୁର ଗାଁରେ ଆତଙ୍କ ଖେଳାଉ ଥିଲେ । ଯେଉଁଥିରେ ଅତିଷ୍ଠ ହୋଇ ଗାଁ ଲୋକେ ଗତ ୧୯ତାରିଖରେ ବ୍ରହ୍ମପୁର ଏସ୍ପିଙ୍କ ଦ୍ୱାରସ୍ଥ ହୋଇଥିଲେ । ଅଭିଯୋଗକୁ ଭିତ୍ତିକରି ଶିବା ଓ ତାଙ୍କ ଗ୍ୟାଙ୍ଗକୁ ଧରିବା ପାଇଁ ପୋଲିସ ଜାଲ ବିଛାଇ ଥିଲା । ଶିବା ଓ ତାଙ୍କ ଗ୍ୟାଙ୍ଗ୍ ଗୋପାଳପୁର ଥାନା ଅନ୍ତର୍ଗତ ବଡ଼କୁଶସ୍ଥଳୀ ଗାଁ ନିକଟସ୍ଥ ଏକ ନିର୍ଜନ ସ୍ଥାନରେ ବସି ଲୁଟ୍ ପାଇଁ ଯୋଜନା କରୁଥିଲେ । ଏ ସମ୍ପର୍କରେ ପୁଲିସ ସୂଚନା ପାଇ ସେଠାରେ ଚଢ଼ାଉ କରିଥିଲା । ପୋଲିସକୁ ଦେଖି ଶିବା ଓ ତାଙ୍କ ଗ୍ୟାଙ୍ଗର ସଦସ୍ୟମାନେ ବୋମାମାଡ଼ କରିଥିଲେ । ପୋଲିସ ଏହାର ପାଲଟା ଜବାବ ଦେଇଥିଲା । ପରେ ପୋଲିସ ସେଠାରୁ ଶିବାଙ୍କ ସମେତ ୯ ଜଣଙ୍କୁ ଗିରଫ କରିବାରେ ସଫଳ ହୋଇଥିଲା । ତେବେ ଅନ୍ୟ ୩ଜଣ ଅପରାଧୀ ସେଠାରୁ ଫେରାର ହୋଇଯାଇଥିଲେ ।
