ତାମିଲ ସୁପରଷ୍ଟାର ତଥା ରାଜନେତା କମଲ ହାସନ ଯାଇପାରନ୍ତି ରାଜ୍ୟସଭା । ଷ୍ଟାଲିନଙ୍କ ଦଳ ଡି.ଏମ.କେ କମଲଙ୍କୁ ରାଜ୍ୟସଭା ଆସନ ଦେଇପାରନ୍ତି । ଆଜି ତାମିଲନାଡୁର ମନ୍ତ୍ରୀ ପିକେ ଶେଖର ବାବୁ କମଲ ହାସନଙ୍କୁ ତାଙ୍କ ବାସଭବନରେ ଭେଟିଥିଲେ । ଯାହାକୁ ନେଇ ଏବେ ଚର୍ଚ୍ଚା ଜୋର ।
ପ୍ରକୃତରେ କମଲ ହାସନ ମକ୍କଲ ନିଧି ମୟମ (ଏମ୍ଏନ୍ଏମ୍) ନାମରେ ନିଜର ଦଳ ଗଠନ କରିଥିଲେ । ୨୦୨୪ ଲୋକସଭା ନିର୍ବାଚନରେ ସେ ଭାରତ ମେଣ୍ଟରେ ଯୋଗଦେବାକୁ ନିଷ୍ପତ୍ତି ନେଇଥିଲେ । ସେ ତାମିଲନାଡୁରେ ଡିଏମକେ ନେତୃତ୍ୱାଧୀନ ମେଣ୍ଟ ପାଇଁ ଜୋରଦାର ପ୍ରଚାର ମଧ୍ୟ କରିଥିଲେ । ଏହି ଭାରତୀୟ ଗଠବନ୍ଧନ ରାଜ୍ୟର ୩୯ଟି ଲୋକସଭା ଆସନ ଜିତିଥିଲା ।
ଡିଏମକେର ସୂଚନା ଅନୁସାରେ, ଡିଏମକେ ମୁଖ୍ୟ ଏମ.କେ ଷ୍ଟାଲିନ ଲୋକସଭା ନିର୍ବାଚନରେ ସମର୍ଥନ ବଦଳରେ କମଲ ହାସନଙ୍କୁ ରାଜ୍ୟସଭା ଆସନ ଦେବାକୁ ପ୍ରତିଶ୍ରୁତି ଦେଇଥିଲେ । କୁହାଯାଉଛି ଯେ,ଶେଖର ବାବୁ ଏହି ସମ୍ପର୍କରେ କମଲ ହାସନଙ୍କୁ ଭେଟିଥିଲେ। ଏହି ସମୟରେ ସେ ଷ୍ଟାଲିନଙ୍କ ବାର୍ତ୍ତା କମଲଙ୍କୁ ଶୁଣାଇଥିଲେ ଯେ ତାଙ୍କୁ ରାଜ୍ୟସଭାକୁ ପଠାଯିବ।
ଏମ୍ଏନ୍ଏମ୍ ମୁଖପାତ୍ର ଏବଂ ପ୍ରସିଦ୍ଧ ତାମିଲ ଚଳଚ୍ଚିତ୍ର ପ୍ରଯୋଜକ ମୁରଲୀ ଆପ୍ପା ନିଶ୍ଚିତ କରିଛନ୍ତି ଯେ ଦଳ ରାଜ୍ୟସଭା ଆସନ ପାଇବ। ତଥାପି, ସେ ଏହା ମଧ୍ୟ କହିଛନ୍ତି ଯେ ପ୍ରାର୍ଥୀ କିଏ ହେବ ତାହା କମଲ ହାସନ ନିଷ୍ପତ୍ତି ନେବେ । ସେ କହିଛନ୍ତି ଯେ,କମଲ ହାସନ କୌଣସି ନିଷ୍ପତ୍ତି ନେବା ପୂର୍ବରୁ ଦଳୀୟ ପଦାଧିକାରୀଙ୍କ ସହ ପରାମର୍ଶ କରିବେ । ସେ ଶେଖର ବାବୁ ଏବଂ ହାସନଙ୍କ ମଧ୍ୟରେ ହୋଇଥିବା ସାକ୍ଷାତକୁ ସ୍ୱୀକାର କରିଥିଲେ କିନ୍ତୁ ଏ ବିଷୟରେ ଅଧିକ ବିବରଣୀ ଦେଇ ନଥିଲେ ।