ହାଟଡିହି/ବିଭୁତି ଭୂଷଣ ଜେନା : କେନ୍ଦୁଝର ଜିଲ୍ଲା ହାଟଡ଼ିହି ବ୍ଲକ ନନ୍ଦିପଦା ଥାନା ଅଧିନସ୍ଥ ଅସିଆ ଗ୍ରାମରେ ପୋଖରୀରେ ବୁଡି ଜଣେ ୭ବର୍ଷୀୟ ନା ବାଳକର ମୃତ୍ୟୁ ଘଟିଛି। ଅସିଆ ମୁଣ୍ଡାସାହି ପ୍ରାଥମିକ ବିଦ୍ୟାଳୟରେ ପଢ଼ୁଥିବା ଗ୍ରାମର ସ୍ବର୍ଗତ ତାଣ୍ଡି ହୋଙ୍କ ୭ବର୍ଷୀୟ ପୁଅ ସୁରେନ୍ଦ୍ର ହୋ ଗତ କାଲି ସ୍କୁଲ ଛୁଟି ପରେ ଘରକୁ ଯାଇ ଖାଇ ସାରିବା ପରେ ଗାଧୋଇବାକୁ କହି ଆସିଥିଲା। କିନ୍ତୁ ଆଉ ଘରକୁ ନ ଫେରିବା ଯୋଗୁଁ ମା ଶ୍ରୀମତୀ ହୋ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ ମଧ୍ୟ କିଛି ସନ୍ଧାନ ପାଇ ନଥିଲେ। ଆଜି ସକାଳୁ ଗାଁ ନିକଟସ୍ଥ ପୋଖରୀରେ ଏହି ନା ବାଳକ ଛାତ୍ରର ଶବ ଭାସୁଥିବା ଦେଖିବାକୁ ମିଳିଥିଲା। ଖବର ପାଇ ନନ୍ଦିପଦା ପୁଲିସ ଘଟଣାସ୍ଥଳରେ ପହଞ୍ଚି ହାଟଡ଼ିହି ଦମକଳ କେନ୍ଦ୍ରର କର୍ମଚାରୀ ଙ୍କ ସହଯୋଗରେ ଶବକୁ ଉଦ୍ଧାର କରି ପୋଷ୍ଟମଟମ ପାଇଁ ପଠାଇ ତଦନ୍ତ ଚଳାଇଛି। ଗତ ୬ମାସ ତଳେ ସୁରେନ୍ଦ୍ରଙ୍କ ବାପା ତାଣ୍ଡି ହୋ ମଧ୍ୟ ପାଣିରେ ବୁଡିଯାଇ ମୃତ୍ୟୁ ବରଣ କରିଥିଲେ।
