ବ୍ୟୁରୋ-: ଆଜି ୪୧ତମ ସିଆଚୀନ ଦିବସ । ଏହି ଦିନଟି ସାହସୀ ସିଆଚୀନ ଭାରତୀୟ ଯୋଦ୍ଧାମାନଙ୍କୁ ଶ୍ରଦ୍ଧାଞ୍ଜଳି ଦେବାର ଦିନ, ଯେଉଁମାନେ ନିଜ ଜୀବନର ଚିନ୍ତା ନକରି ଦେଶକୁ ସୁରକ୍ଷା ଦେଇଥିଲେ ଏବଂ ଶତ୍ରୁମାନଙ୍କ ପ୍ରତ୍ୟେକ ପ୍ରୟାସକୁ ବିଫଳ କରିଥିଲେ । ପ୍ରତିବର୍ଷ ଏପ୍ରିଲ ୧୩ ତାରିଖକୁ ୧୯୮୪ ମସିହାରେ ଆରମ୍ଭ ହୋଇଥିବା ‘ଅପରେସନ୍ ମେଘଦୂତ’କୁ ମନେ ପକାଇବା ପାଇଁ ‘ସିଆଚୀନ ଦିବସ’ ଭାବରେ ପାଳନ କରାଯାଏ । ଏହି ଦିନ ଭାରତୀୟ ସେନା ବିଶ୍ୱର ସର୍ବୋଚ୍ଚ ଏବଂ କଠିନ ଯୁଦ୍ଧକ୍ଷେତ୍ର – ସିଆଚୀନ ଗ୍ଲେସିୟର୍ ରେ ନିଜର ପତାକା ସ୍ଥାପନ କରିଥିଲା ।
୧୯୮୪ ମସିହାରେ, ପାକିସ୍ତାନର ସମ୍ଭାବ୍ୟ ସାମରିକ କାର୍ଯ୍ୟାନୁଷ୍ଠାନ ବିଷୟରେ ସୂଚନା ପାଇବା ପରେ, ଭାରତୀୟ ସେନା ସିଆଚୀନ ଗ୍ଲେସିୟରରେ ରଣନୈତିକ ସ୍ଥାନଗୁଡ଼ିକୁ ସୁରକ୍ଷିତ କରିବା ପାଇଁ ‘ଅପରେସନ୍ ମେଘଦୂତ’ ଆରମ୍ଭ କରିଥିଲା, ଯାହା ପରେ ୧୩ ଏପ୍ରିଲ୍ ୧୯୮୪ରେ ଭାରତୀୟ ସୈନ୍ୟମାନେ ବିଲାଫୋଣ୍ଡ ଲା ଏବଂ ସିଆଲା ପାସ୍ କବ୍ଜାକରି ସମଗ୍ର ସିଆଚୀନ ଅଞ୍ଚଳକୁ ନିଜ ନିୟନ୍ତ୍ରଣରେ ନେଇଥିଲେ । ସିଆଚୀନ ଗ୍ଲେସିୟର ପାକିସ୍ତାନ ଅଧିକୃତ କାଶ୍ମୀର (POK), ଅକ୍ସାଇ ଚୀନ୍ ଏବଂ ଶାକ୍ସଗାମ୍ ଉପତ୍ୟକା ସହିତ ସଂଲଗ୍ନ, ଯାହାକୁ ପାକିସ୍ତାନ ୧୯୬୩ ମସିହାରେ ଚୀନ୍କୁ ହସ୍ତାନ୍ତର କରିଥିଲା । ଏହା ଭାରତ ପାଇଁ ଏକ ଗୁରୁତ୍ୱପୂର୍ଣ୍ଣ ରଣନୈତିକ କ୍ଷେତ୍ର କାରଣ ଏଠାରୁ ଶତ୍ରୁ କାର୍ଯ୍ୟକଳାପ ଉପରେ ନଜର ରଖାଯାଇପାରିବ । ଏହା ବ୍ୟତୀତ, ଏହି ସ୍ଥାନ ଲେହରୁ ଗିଲଗିଟ ପର୍ଯ୍ୟନ୍ତ ରାସ୍ତାଗୁଡ଼ିକୁ ମଧ୍ୟ ନିୟନ୍ତ୍ରଣ କରେ, ଯାହା ଏହାର ସାମରିକ ଏବଂ ରଣନୈତିକ ଗୁରୁତ୍ୱକୁ ଆହୁରି ବୃଦ୍ଧି କରେ ।
ତେବେ ୧୯୮୪ ମସିହା ଠାରୁ ସାହସୀ ଭାରତୀୟ ସୈନିକମାନେ ନିୟମିତ ଭାବରେ ଅତ୍ୟନ୍ତ ଚ୍ୟାଲେଞ୍ଜିଂ ପରିସ୍ଥିତିରେ ୨୦,୦୦୦ ଫୁଟ ଏବଂ ତା’ଠାରୁ ଅଧିକ ଉଚ୍ଚତାରେ ସୀମାର ରକ୍ଷା କରି ଆସୁଛନ୍ତି ।