ଜୟପୁର-: ରାଜସ୍ଥାନର ରାଜଧାନୀ ଜୟପୁରରେ ଅବସ୍ଥିତ ସୱାଇ ମାନସିଂହ ଷ୍ଟାଡିୟମ୍ କୁ ପୁଣି ଥରେ ବୋମା ଧମକ ମିଳିଛି । ଗତ ପାଞ୍ଚ ଦିନ ମଧ୍ୟରେ ଏହା ଦ୍ୱିତୀୟ ଥର ଷ୍ଟାଡିୟମକୁ ଧମକପୂର୍ଣ୍ଣ ଇମେଲ୍ ମିଳିଛି । ସୋମବାର (୧୨ ମଇ) ସକାଳେ ଜୟପୁର କ୍ରୀଡା ପରିଷଦ ପୁଣି ଏକ ଧମକପୂର୍ଣ୍ଣ ଇମେଲ୍ ପାଇଲା । ଇମେଲ୍ ପାଇବା ପରେ, ଷ୍ଟାଡିୟମକୁ ଖାଲି କରାଯାଇ ଯାଞ୍ଚ କରାଯାଇଛି । ଖୋଜାଖୋଜିରେ କୌଣସି ସନ୍ଦେହଜନକ ବସ୍ତୁ ମିଳିନାହିଁ। ଷ୍ଟାଡିୟମରେ ବୋମା ନିଷ୍କ୍ରିୟକାରୀ ଦଳ ସମେତ ଅନେକ ପୋଲିସ ଦଳ ଏବେ ବି ଉପସ୍ଥିତ ଅଛନ୍ତି।
ଆଜି ମିଳିଥିବା ଇମେଲ୍ରେ ଏହା ମଧ୍ୟ ଲେଖାଯାଇଛି ଯେ ଅପରେସନ୍ ସିନ୍ଦୂରର ସଫଳତାର ପ୍ରତିଶୋଧ ନେବା ପାଇଁ ଷ୍ଟାଡିୟମ୍ ଉପରେ ବୋମା ମାଡ଼ କରାଯିବ। ମେ ୮ ତାରିଖରେ ପଠାଯାଇଥିବା ଇମେଲରେ ଠିକ୍ ସମାନ ବାର୍ତ୍ତା ଲେଖାଯାଇଥିଲା । ଷ୍ଟାଡିୟମ ବ୍ୟତୀତ, ମେଟ୍ରୋ ଟ୍ରେନକୁ ଉଡ଼ାଇ ଦେବା ପାଇଁ ଏକ ଧମକପୂର୍ଣ୍ଣ ଇମେଲ୍ ମଧ୍ୟ ମେ ୯ ତାରିଖରେ ଆସିଥିଲା। ଏହା ପରେ, ମେଟ୍ରୋ ଷ୍ଟେସନ ଏବଂ ଟ୍ରେନଗୁଡ଼ିକର ସୁରକ୍ଷା ମଧ୍ୟ ବୃଦ୍ଧି କରାଯାଇଥିଲା । ରାଜସ୍ଥାନ ପୋଲିସ ଏବେ ଧମକପୂର୍ଣ୍ଣ ଇମେଲ୍ ପଠାଇଥିବା ବ୍ୟକ୍ତିଙ୍କୁ ଠାବ କରିବାକୁ ନିରନ୍ତର ଚେଷ୍ଟା କରୁଛି । ଦାବି କରାଯାଇଛି ଯେ ଇମେଲ୍ଟି ପାକିସ୍ତାନରୁ ପଠାଯାଇଥିଲା ।