କୋରେଇ : କୋରେଇ ଥାନା ତୁଳତୀ ଗ୍ରାମ ନୂଆ ଗଡ଼ିଆ ପୋଖରିକୁ ଗାଧୋଇବା ପାଇଁ ଯାଇ ବ୍ୟକ୍ତି ନିଖୋଜ l ସୂଚନା ମୁତାବକ ତୁଳତୀ ଗ୍ରାମର ଜଣେ ବ୍ୟକ୍ତି ଆଜି ମଧ୍ୟାହ୍ନରେ ଗ୍ରାମ ପୋଖରିକୁ ଗାଧୋଇବାକୁ ଆସି ଆଉ ଘରକୁ ଫେରି ନଥିଲେ l ତେବେ ଘର ଲୋକେ ପୋଖରି ତୁଠରେ ତାଙ୍କ ଗାମୁଛା ପଡ଼ିଥିବା ଦେଖିବାକୁ ପାଇଥିଲେ l
ଗାଧୋଇବା ପାଇଁ ଯାଇଥିବା ବେଳେ କୌଣସି କାରଣରୁ ଗଭୀର ପାଣିରେ ବୁଡି ଯାଇଥିବା ସନ୍ଦେହ କରିବା ସହ ସ୍ଥାନୀୟ ଲୋକେ ଦମକଳ ବାହିନୀକୁ ଖବର ଦେଇଥିଲେ l ଖବର ପାଇ ବୈତରଣୀ ରୋଡ ଦମକଳ କେନ୍ଦ୍ରର କର୍ମଚାରୀ ପହଞ୍ଚି ପୋଖରୀରେ ଖୋଜାଖୋଜି କରିଥିଲେ l ବହୁ ସମୟ ପରେ ଶେଷରେ ବ୍ୟକ୍ତିଙ୍କୁ ଉଦ୍ଧାର କରି କୋରେଇ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ l ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ l ମୃତ ବ୍ୟକ୍ତି ଜଣକ ସ୍ଥାନୀୟ ତୁଳତୀ ଗ୍ରାମର ବିଦ୍ୟାଧର ପଲେଇ ବୋଲି ଜଣା ପଡିଛି l