ମେକ୍‍ ଇନ ଓଡ଼ିଶା କନକ୍ଲେଭ ୨୦୧୮, ଯୋଗଦେବେ ୨ ହଜାର ପ୍ରତିନିଧି

0

(ଶୁଭସ୍ମିତା ଦାଶ): ଭୁବନେଶ୍ୱର ଠାରେ ନଭେମ୍ବର ମାସରେ ଅନୁଷ୍ଠିତ ହେବ ମେକ୍‍ ଇନ ଓଡ଼ିଶା କନକ୍ଲେଭ-୨୦୧୮ କାର୍ୟ୍ୟକ୍ରମ । ଶୁକ୍ରବାର ଶିଳ୍ପମନ୍ତ୍ରୀ ଅନନ୍ତ ଦାସ କନକ୍ଲେଭର ପ୍ରମୁଖ ପ୍ରାୟୋଜକ ଫେଡେରେସନ ଅଫ ଇଣ୍ଡିଆନ ଚାମ୍ବର୍ସ ଅଫ କମର୍ସ ଆଣ୍ଡ ଇଣ୍ଡଷ୍ଟ୍ରିଜ(ଫିକି)ର ପ୍ରତିନିଧିଙ୍କ ସହ ଏ ସମ୍ପର୍କରେ ଆଲୋଚନା କରିଥିଲେ। ଚଳିତବର୍ଷ ଏହି କନକ୍ଲେଭ ମାଧ୍ୟମରେ ଯେପରି ଅଧିକ ପୁଞ୍ଜିନିବେଶ ହୋଇପାରିବ ସେଥିପାଇଁ ଉଦ୍ୟମ କରିବା ଉପରେ ମନ୍ତ୍ରୀ ଶ୍ରୀ ଦାସ ଗୁରୁତ୍ୱାରୋପ କରିଛନ୍ତି। ଏହା ନଭେମ୍ବର ୧୧ରୁ ୧୫ ପର୍ଯ୍ୟନ୍ତ ଅନୁଷ୍ଠିତ ହେବ ।

ଏଥିରେ ପ୍ରାୟ୨ହଜାର ପ୍ରତିନିଧି ଯୋଗଦେବେ। ବିଦେଶୀ ରାଷ୍ଟ୍ରରୁ ପ୍ରାୟ ୬୦ଜଣ ଶିଳ୍ପ ପ୍ରତିନିଧି ଯୋଗଦେବାକୁ ସ୍ୱୀକୃତି ମିଳିଛି। ସେହିପରି ୫୦ଟି ଭାରତୀୟ ବୃହତ କମ୍ପାନୀ ଯୋଗ ଦେଇ ସେମାନଙ୍କ ଉତ୍ପାଦ ପ୍ରଦର୍ଶନ କରିବେ। ଏହି କନକ୍ଲେଭର ଆୟୋଜନ ନିମନ୍ତେ ଆନୁଷଙ୍ଗିକ କାର୍ୟ୍ୟକ୍ରମର ଅଗ୍ରଗତି ସମ୍ପର୍କରେ ସମୀକ୍ଷା ବେଳେ ଏହି ସୂଚନା ମିଳିଛି।

ଫିକିର ସେକ୍ରେଟାରୀ ଜେନେରାଲ ଦିଲୀପ ଚେନୟ ଏବଂ ଡେପୁଟି ସେକ୍ରେଟାରୀ ଜେନେରାଲ ଅରୁଣ ଚାୱଲା ଆଲୋଚନାରେ ଭାଗ ନେଇ କନକ୍ଲେଭରେ ଚୀନ, ଜାପାନ, ଜର୍ମାନ, ଇଟାଲୀ, ଦକ୍ଷିଣ କୋରିଆ ଆଦି ରାଷ୍ଟ୍ରରୁ ଶିଳ୍ପ ପ୍ରତିନିଧି ଯୋଗଦେବା ପାଇଁ ସମ୍ମତି ପ୍ରଦାନ କରିଥିବା କହିଥିଲେ। ଚଳିତବର୍ଷ ଇସ୍ପାତ, ଖାଦ୍ୟ ପ୍ରକ୍ରିୟାକରଣ, ବୟନ ଶିଳ୍ପ, ରସାୟନ, ଏରୋସ୍ପେସ ଓ କ୍ରୀଡ଼ା ଆଦି କ୍ଷେତ୍ରରେ ପୁଞ୍ଜିନିବେଶ ନିମନ୍ତେ ଆମନ୍ତ୍ରିତ କରାଯାଇଥିବା ଶିଳ୍ପସଂସ୍ଥାର ଦୁଇ ହଜାରରୁ ଅଧିକ ପ୍ରତିନିଧି ଏଥିରେ ଅଂଶ ଗ୍ରହଣ କରିବେ।

ଏହି ପ୍ରତିନିଧିମାନଙ୍କୁ ରାଜ୍ୟ ସରକାରଙ୍କ ପକ୍ଷରୁ ଆବଶ୍ୟକ ସୁବିଧା ସୁଯୋଗ ଦେବାରେ ଯେପରି ଅସୁବିଧା ନହୁଏ ସେଥିପ୍ରତି ଦୃଷ୍ଟି ଦେବାକୁ ମନ୍ତ୍ରୀ ଶ୍ରୀ ଦାସ ଉପସ୍ଥିତ ବରିଷ୍ଠ ଅଧିକାରୀମାନଙ୍କୁ ପରାମର୍ଶ ଦେଇଛନ୍ତି। ବୈଠକରେ ଉପସ୍ଥିତ ଇଡକୋର ଅଧ୍ୟକ୍ଷ ତଥା ପରିଚାଳନା ନିର୍ଦେଶକ ସଞ୍ଜୟ ସିଂହ କନକ୍ଲେଭର ଆୟୋଜନ ସମ୍ପର୍କରେ ଅବଗତ କରିଥିଲେ।