କାନପୁର : ଜବର ଦଖଲ ଉଚ୍ଛେଦ ବେଳେ ଘଟିଛି ବଡ ଅଘଟଣ । ଉତ୍ତରପ୍ରଦେଶର କାନପୁରରେ ହୋଇଥିବା ବୁଲ୍ଡୋଜର୍ ଆକ୍ସନରେ ଘରେ ନିଆଁ ଲାଗି ମାଆ ଓ ଝିଅଙ୍କ ମୃତ୍ୟୁ ଘଟିଛି । ଏଭଳି ଘଟଣାକୁ ନେଇ ତହସିଲ ପ୍ରଶାସନ ଉପରେ ହତ୍ୟା ଅଭିଯୋଗ ଲଗାଯାଇଛି। ସାଧାରଣରେ କୁହାଯାଉଛି ଯେ ବୁଲ୍ଡୋଜର ଆକ୍ସନ ବେଳେ ମାଆ ଓ ଝିଅ ରହୁଥିବା ଛପର ଘରେ ନିଆଁ ଲାଗିବାରୁ ସେମାନଙ୍କର ମୃତ୍ୟୁ ହୋଇଛି। ଏହି ଦୁଇ ଜଣଙ୍କୁ ବଞ୍ଚାଇବାକୁ ଚେଷ୍ଟା କରି ପରିବାରର ମୁଖିଆ ଗୁରୁତର ଆହତ ହୋଇଛନ୍ତି । ଏହି ଘଟଣାକୁ ନେଇ ପୋଲିସ ଅଧୀକ୍ଷକ ଗଣାମଧ୍ୟମରେ ନିଜର ବୟାନ ଦେଇ କହିଛନ୍ତି ଯେ ‘ଜବରଦଖଲ ଉଚ୍ଛେଦ ଅଭିଯାନ ପାଇଁ ଆମର ଏକ ଦଳ ଯାଇ ଗ୍ରାମରେ ପହଞ୍ଚିଥିଲା । ସେହି ସମୟରେ ମହିଳା ଓ ତାଙ୍କ ଝିଅ ଘର ଭିତରେ ରହି ନିଜେ ନିଆଁ ଲଗାଇ ଦେଲେ। ଯେଉଁ କାରଣରୁ ସେ ଦୁଇ ଜଣଙ୍କର ମୃତ୍ୟୁ ଘଟିଛି। ଏହି ଘଟଣାକୁ ନେଇ ଏବେ ତଦନ୍ତ ଆରମ୍ଭ ହୋଇଛି । ଏହି ଘଟଣା ପୂର୍ବରୁ ଗତ ଜାନୁଆରି ମାସରେ ପୀଡ଼ିତ ପରିବାରଙ୍କ ଘର ଭାଙ୍ଗି ଦିଆଯାଇଥିଲା । ଯାହାପରେ ସେମାନେ ଜିଲ୍ଲାପାଳଙ୍କୁ ଭେଟି ନ୍ୟାୟ ପାଇଁ ଗୁହାରି କରିଥିଲେ। ପୀଡ଼ିତାଙ୍କ ପରିବାର ପକ୍ଷରୁ କୁହାଯାଇଛି ଯେ ତହସିଲ ପ୍ରଶାସନର ଲୋକ ଗ୍ରାମରେ ଥିବା ଏକ ମନ୍ଦିର ଭାଙ୍ଗିବାକୁ ଯାଇ ପହଞ୍ଚିଥିଲେ। ସେହି ସମୟରେ ସେମାନେ ଘରେ ନିଆଁ ଲଗାଇ ଦେଇଥିଲେ ।
