ପାକିସ୍ତାନ ପଞ୍ଜାବର ଅମୃତସରରେ ଥିବା ସ୍ୱର୍ଣ୍ଣ ମନ୍ଦିରକୁ କ୍ଷେପଣାସ୍ତ୍ର ଏବଂ ଡ୍ରୋନ୍ ମାଧ୍ୟମରେ ଆକ୍ରମଣ କରିବାକୁ ଚେଷ୍ଟା କରିଥିଲା
ଅମୃତସର-: ଭାରତର ନଅଟି ସ୍ଥାନରେ ଆତଙ୍କବାଦୀ ଶିବିର ଉପରେ ଆକ୍ରମଣ ପରେ ମେ ୮ ତାରିଖରେ ପାକିସ୍ତାନ ପଞ୍ଜାବର ଅମୃତସରରେ ଥିବା ସ୍ୱର୍ଣ୍ଣ ମନ୍ଦିରକୁ କ୍ଷେପଣାସ୍ତ୍ର ଏବଂ ଡ୍ରୋନ୍ ମାଧ୍ୟମରେ ଆକ୍ରମଣ କରିବାକୁ ଚେଷ୍ଟା କରିଥିଲା। ମାତ୍ର ପାକ୍ର ଆକ୍ରମଣ ଉଦ୍ୟମକୁ ପଣ୍ଡ କରିଥିଲେ ଆମ ଭାରତୀୟ ଯବାନ। ଅତ୍ୟାଧୁନିକ ଆକାଶ ମିସାଇଲ୍ ସିଷ୍ଟମ ଓ L-70 ଏୟାର ଡିଫେନ୍ସ ଗନ୍ ପାକିସ୍ତାନର ଟାର୍ଗେଟକୁ ବିଫଳ କରିଦେଇଥିଲେ । ଏୟାର ଡିଫେନ୍ସ ସିଷ୍ଟମ ଦ୍ବାରା ପାକିସ୍ତାନର ହମଲା ଯୋଜନାକୁ ଧୂଳିସାତ କରିଥିଲା ଇଣ୍ଡିଆନ ଆର୍ମି । ସ୍ୱର୍ଣ୍ଣ ମନ୍ଦିରକୁ ସମ୍ପୂର୍ଣ୍ଣ ବାୟୁ ପ୍ରତିରକ୍ଷା କଭର ପ୍ରଦାନ କରିବା ପାଇଁ ସେନା ପକ୍ଷରୁ ଅତିରିକ୍ତ ଆଧୁନିକ ଅସ୍ତ୍ରଶସ୍ତ୍ର ଏକାଠି କରାଯାଇଥିଲା ।
ଏନେଇ ୧୫ତମ ଇନ୍ଫାନ୍ଟାରି ଡିଭିଜନର ଜେନେରାଲ ଅଫିସର କମାଣ୍ଡିଂ (ଜିଓସି) ମେଜର ଜେନେରାଲ କାର୍ତ୍ତିକ ସି ଶେଷାଦ୍ରି ସୋମବାର ପ୍ରକାଶ କରିଛନ୍ତି। ମେଜର ଜେନେରାଲ କହିଛନ୍ତି ଯେ ଭାରତୀୟ ସେନା ସ୍ୱର୍ଣ୍ଣ ମନ୍ଦିର ଭଳି ଧାର୍ମିକ ସ୍ଥାନ ସମେତ ବେସାମରିକ ପ୍ରତିଷ୍ଠାନ ସହିତ ପାକିସ୍ତାନର ସାମରିକ ପ୍ରତିଷ୍ଠାନକୁ ଟାର୍ଗେଟ କରିବାର ପଦକ୍ଷେପକୁ ଅନୁମାନ କରିଥିଲା। ଯାହାଫଳରେ ଆବଶ୍ୟକୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ସମସ୍ତ ଷଡ଼ଯନ୍ତ୍ରକୁ ପଣ୍ଡ କରାଯାଇଛି।
ସେ ଆହୁରି କହିଛନ୍ତି ଯେ ‘‘ପାକିସ୍ତାନ ମେ ୮ ତାରିଖରେ ମାନବହୀନ ବାୟୁ ଅସ୍ତ୍ରଶସ୍ତ୍ର; ମୁଖ୍ୟତଃ ଡ୍ରୋନ୍ ଏବଂ ଦୂରଗାମୀ କ୍ଷେପଣାସ୍ତ୍ର ସହିତ ଏକ ବଡ଼ ବିମାନ ଆକ୍ରମଣ କରିଥିଲା। ଏପରି ହେବ ବୋଲି ଆମେ ପୂର୍ବରୁ ଆଶଙ୍କା କରି ସତର୍କ ରହିଥିଲୁ। ଆମର ସାହସୀ ଏବଂ ସତର୍କ ସେନା ବାୟୁ ପ୍ରତିରକ୍ଷା ବନ୍ଧୁକଧାରୀମାନେ ପାକିସ୍ତାନ ସେନାର ଘୃଣ୍ୟ ଯୋଜନାକୁ ପଣ୍ଡ କରିବାରେ ସଫଳ ହୋଇଥିଲେ। ସ୍ୱର୍ଣ୍ଣ ମନ୍ଦିରକୁ ଟାର୍ଗେଟ କରାଯାଇଥିବା ସମସ୍ତ ଡ୍ରୋନ୍ ଏବଂ କ୍ଷେପଣାସ୍ତ୍ରକୁ ଗୁଳି କରି ଖସାଇ ଦେଇଥିଲେ। ଏପରିକି ଆମର ପବିତ୍ର ସ୍ୱର୍ଣ୍ଣ ମନ୍ଦିରରେ ଗୋଟିଏ ବି ଆଘାତ ଲାଗିବାକୁ ଦେଲେ ନାହିଁ,”।