ନୂଆଦିଲ୍ଲୀ: ଆସାମର ପ୍ରସିଦ୍ଧ କାମାକ୍ଷା ମନ୍ଦିରକୁ ନେଇ ଗୁଜବ ପ୍ରଚାର କରିବା ଜଣେ ନ୍ୟୁଜ୍ ଆଙ୍କରଙ୍କୁ ମହଙ୍ଗା ପଡିଛି । ଆଙ୍କର ଜଣଙ୍କ କହିଥିଲେ ଯେ ମା କାମାକ୍ଷା ଦେବୀଙ୍କ ମନ୍ଦିରରେ ‘ମାନବ ବଳି’ ଦିଆଯାଏ । ଯାହାକୁ ନେଇ ଏବେ ଆଙ୍କର୍ ଜଣଙ୍କ ବିବାଦ ମଧ୍ୟରେ ଫସିଛନ୍ତି । ନ୍ୟୁଜ୍ ଆଙ୍କର ଜଣଙ୍କ ଏକ ଲାଇଭ୍ ଶୋ’ ରେ ଦାବି କରିଥିଲେ ଯେ ଆସାମର କାମାକ୍ଷା ମନ୍ଦିରରେ ‘ମାନବ ବଳି’ ଦିଆଯାଏ। ଇନ୍ଦୋର ବ୍ୟବସାୟୀ ରାଜା ରଘୁବଂଶୀଙ୍କ ସମ୍ପର୍କୀୟଙ୍କ ସହ ଲାଇଭ୍ ଆଲୋଚନା ସମୟରେ ସେ ଏହି ଦାବି କରିଥିଲେ। ଇଏ ହେଉଛନ୍ତି ସେହି ରାଜା ରଘୁବଂଶୀ ଯାହାଙ୍କୁ ଗତ କିଛି ଦିନ ତଳେ ହନିମୁନ ପାଇଁ ମେଘାଳୟ ଯାଇଥିବା ବେଳେ ତାଙ୍କ ପତ୍ନୀ ଏବଂ ପ୍ରେମିକ ମିଶି ହତ୍ୟା କରିଥିଲେ। ଏହି ପ୍ରସଙ୍ଗରେ ଆଙ୍କର ଜଣଙ୍କ ରାଜା ରଘୁବଂଶୀଙ୍କ ସମ୍ପର୍କୀୟ ସୃଷ୍ଟି ରଘୁବଂଶୀଙ୍କ ସହିତ କଥା ହୋଇଥିଲେ। ଏହି ଆଲୋଚନା ବେଳେ ହିନ୍ଦୁ ତୀର୍ଥସ୍ଥଳ ବିଷୟରେ ଆପତ୍ତିଜନକ କଥା କୁହାଯାଇଥିଲା।
ଏବେ ଗୌହାଟି ପୋଲିସର କ୍ରାଇମବ୍ରାଞ୍ଚ ଏହି ମାମଲାରେ ନ୍ୟୁଜ୍ ଆଙ୍କର ଏବଂ ସୃଷ୍ଟି ରଘୁବଂଶୀ ଉଭୟଙ୍କୁ ସମନ ପଠାଇଛି। ପୋଲିସ କହିଛି ଯେ କାମାକ୍ଷା ମନ୍ଦିର ଭଳି ଏକ ପବିତ୍ର ସ୍ଥାନ ବିଷୟରେ ଏପରି ମିଥ୍ୟା ଏବଂ ଅପମାନଜନକ ଦାବି କରିବା ଏକ ଗମ୍ଭୀର ମାମଲା। ତେବେ ଆଙ୍କର କିମ୍ବା ଚ୍ୟାନେଲର ନାମ ଏପର୍ଯ୍ୟନ୍ତ ପ୍ରକାଶ କରାଯାଇ ନାହିଁ। ଗୌହାଟି ସିଟି ପୋଲିସର କହିବା ଅନୁସାରେ ଧାର୍ମିକ ଭାବନାକୁ ଆଘାତ ପହଞ୍ଚାଇବା ଅଭିଯୋଗରେ ମାମଲା ରୁଜୁ କରାଯାଇଛି । ଏହାପରେ ଉକ୍ତ ଆଙ୍କର ଏବଂ ସୃଷ୍ଟି ରଘୁବଂଶୀ ୨୩ ଏବଂ ୨୪ ଜୁନରେ ହାଜର ହେବା ପାଇଁ ସମନ ପଠାଯାଇଥିଲା । ମାତ୍ର ଏପର୍ଯ୍ୟନ୍ତ ସେମାନେ ହାଜର ହୋଇନଥିବା ନେଇ ଜଣାପଡିଛି ।
ଏକ ଜାତୀୟ ଇଂରାଜୀ ନ୍ୟୁଜ୍ ଚ୍ୟାନେଲର ଆଙ୍କର ସୃଷ୍ଟିଙ୍କ ସହିତ ମେଘାଳୟରେ ରାଜାଙ୍କ ପ୍ରାରମ୍ଭିକ ନିଖୋଜ ବିଷୟରେ ସାକ୍ଷାତକାର ନେଉଥିଲେ। ଏହି ସମୟରେ, ଆଙ୍କର ଦାବି କରିଥିଲେ ଯେ ଆସାମରେ ଥିବା ମନ୍ଦିରରେ ମାନବ ବଳି ପ୍ରଚଳିତ ହୁଏ, ଯାହା ମେଘାଳୟର ପଡ଼ୋଶୀ ରାଜ୍ୟ। ରିପୋର୍ଟ ଅନୁଯାୟୀ, ପୋଲିସ କହିଛି ଯେ ସୃଷ୍ଟି ଲାଇଭ୍ ପ୍ରସାରଣ ସମୟରେ ଆଙ୍କରଙ୍କ ମନ୍ତବ୍ୟ ସହିତ ସହମତ ହୋଇଥିଲେ। ଏହି ମିଥ୍ୟା ଦାବିଗୁଡ଼ିକ ଉତ୍ତେଜନା ସୃଷ୍ଟି କରିବା ପରେ, ଚ୍ୟାନେଲ୍ ଏବଂ ସୃଷ୍ଟି କ୍ଷମା ପ୍ରାର୍ଥନା କରିଥିଲେ। ଏଫଆଇଆରରେ କୁହାଯାଇଛି ଯେ ଆଙ୍କର ଏବଂ ସୃଷ୍ଟି ସେମାନଙ୍କର ମିଥ୍ୟା ଦାବି ପାଇଁ କୌଣସି ଉତ୍ସ, ଧାର୍ମିକ କର୍ତ୍ତୃପକ୍ଷ କିମ୍ବା ଐତିହାସିକ ପ୍ରମାଣ ଉଦ୍ଧୃତ କରିପାରି ନାହାଁନ୍ତି। ଆଙ୍କର ସ୍ପଷ୍ଟ ଭାବରେ ସୂଚନାକୁ ସତ୍ୟ ଭାବରେ ଉପସ୍ଥାପନ କରିଥିଲେ।