(ରିପୋର୍ଟସ ଟୁଡ଼େ)ଆସନ୍ତା ମାର୍ଚ୍ଚ ୨୩ରୁ ଆରମ୍ଭ ହେବ ଆଇପିଏଲ ୨୦୧୯ । ବିବିସିଆଇ ପକ୍ଷରୁ ମଙ୍ଗଳବାର ଦିନ ଘରୋଇ ଟି-୨୦ ଲିଗ୍ ଆଇପିଏଲ ସିଜିନ ୧୨ର ବାକି ସିଡ୍ୟୁଲ ଜାରି କରାଯାଇଛି । ତେବେ ଏହା ପୂର୍ବରୁ ଆଇପିଏଲ ଲିଗ୍ ପର୍ୟ୍ୟାୟର କାର୍ୟ୍ୟସୂଚୀ ଜାରି କରିଛି ବିସିସିଆଇ । ଲିଗ୍ ପର୍ୟ୍ୟାୟର ସମସ୍ତ ମ୍ୟାଚ୍ ପାଇଁ ଘୋଷଣା ହୋଇଛି ତାରିଖ । ମାର୍ଚ୍ଚ ୨୩ରୁ ମେ’ ୫ ପର୍ୟ୍ୟନ୍ତ ଲିଗ୍ ପର୍ୟ୍ୟାୟ ମ୍ୟାଚ୍ ଖେଳାଯିବ । ତେବେ କ୍ୱାଲିଫାୟର, ଏଲିମିନେଟର ଓ ଫାଇନାଲ ମ୍ୟାଚ୍ ପାଇଁ ତାରିଖ ଘୋଷଣା କରିନାହିଁ ବିସିସିଆଇ ।
ପ୍ରଥମ ମୁକାବିଲାରେ ଡିଫେଣ୍ଡିଂ ଚାମ୍ପିୟନ ଚେନ୍ନାଇ ସୁପର କିଙ୍ଗସ ସହ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ମୁହାଁମୁହିଁ ହେବେ । ଏହା ପୂର୍ବରୁ ୧୯ ଫେବ୍ରୁଆରୀରେ ପ୍ରଥମ ଦଫାରେ ୧୭ଟି ମ୍ୟାଚ୍ ପାଇଁ କାର୍ୟ୍ୟସୂଚୀ ପ୍ରକାଶ କରାଯାଇଥିଲା । ତେବେ ସାଧାରଣ ନିର୍ବାଚନ ପାଇଁ ତାରିଖ ଘୋଷଣା ହେବା ପରେ ଲିଗ ପର୍ୟ୍ୟାୟର ସମସ୍ତ ମ୍ୟାଚ୍ ପାଇଁ ତାରିଖ ଘୋଷଣା କରିଛି ବିସିସିଆଇ ।
ଆଇପିଏଲ ମ୍ୟାଚ୍ କାର୍ୟ୍ୟସୂଚୀ ଅନୁଯାୟୀ, ଗୋଟିଏ ମ୍ୟାଚ୍ ଥିଲେ ରାତି ୮ଟାରେ ମ୍ୟାଚ୍ ଆରମ୍ଭ ହେବ ଏବଂ ଯେଉଁଦିନ ଦୁଇଟି ମ୍ୟାଚ୍ ରହିଥିବ ସେଦିନ ଅପରାହ୍ନ ୪ଟାରୁ ମ୍ୟାଚ୍ ଆରମ୍ଭ ହେବ ।