ତରଭା : ତରଭା ଠାରେ ଥିବା ବିଦେଶୀ ମଦ ଦୋକାନରୁ ଚୋରି । ପାଖାପାଖି ସାତ ଲକ୍ଷ ଟଙ୍କାର ମଦ ଚୋରି ହୋଇଥିବା ଜଣାଯାଇଛି। ଗତକାଲି ବିଳମ୍ବିତ ରାତ୍ରିରେ ଚୋରମାନେ ଦୋକାନର ସଟରର ତାଲା ଭାଙ୍ଗି ମଦ ଚୋରି କରିବା ସହ ଦୋକାନରେ ଲାଗିଥିବା ସିସି ଟିଭିରେ ଲାଗିଥିବା ଡିଭିଆର ଏବଂ ହାର୍ଡଡିସ୍କ ନେଇ ଯାଇଛନ୍ତି ।
ଖବର ପାଇ ତରଭା ପୋଲିସ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଆଇଆଇସି ସୁବ୍ରତ କୁମାର ପାଣିଗ୍ରାହୀ, ଏସଆଇ ଯଯାତି କେଶରୀ ସାହୁ ନିକଟରେ ଥିବା ଦୋକାନ ମାନଙ୍କର ସିସି ଟିଭି ଫୁଟେଜ ସଂଗ୍ରହ କରି ଚୋରାମାନଙ୍କୁ ଧରିବା ପାଇଁ ଅଧିକ ତଦନ୍ତ ଚଳାଇ ଥିବା ସୂଚନା ରହିଛି ଓ ପ୍ରକାଶ ଥାଉ ଯେ ବିଦେଶୀ ମଦ ଦୋକାନ ପାଖରେ ଥିବା ହରିହର ଗେରେଜରୁ ମଧ୍ୟ କିଛି ମାସ ତଳେ ଲକ୍ଷାଧିକ ଟଙ୍କାର ଜିନିଷ ଚୋରି ହୋଇଥିଲା ।
ଚୋରମାନେ ଚାରିଚକିଆ ଗାଡ଼ିରେ ଆସି ଚୋରି କରି ଖସି ପଳାଇଥିଲେ । ତରଭା ସହରରେ ବିଗତ ଦିନରେ ଚୋରି, ହତ୍ୟା, ଅସାମାଜିକ କାର୍ୟ୍ୟକଳାପ ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ଯାହାକି ପୋଲିସର ମୁଣ୍ଡବ୍ୟଥାର କାରଣ ସାଜିଥିବା ବେଳେ ସହରବାସୀ ନିଜକୁ ଅସୁରକ୍ଷିତ ମାନେ କରୁଥିବା ଚର୍ଚ୍ଚା ହେଉଛି ।