ନବରଙ୍ଗପୁର : ଅଟୋ ଭିତରୁ ଉଦ୍ଧାର ହେଲା ଯୁବକଙ୍କ ମୃତ ଦେହ । ନବରଙ୍ଗପୁର ନୁଆଁ ବସଷ୍ଟାଣ୍ଡ ପଛରେ ଥିବା ଲୋହରା ଶାଳ ନିକଟରେ ଏକ ଅଟୋ ମଧ୍ୟରେ ଯୁବକଙ୍କ ଶବ ଉଦ୍ଧାର ହୋଇଛି । ମୃତ ଯୁବକ ହେଉଛନ୍ତି ନବରଙ୍ଗପୁର ସହରର ମେଦ୍ରୀ ସାହିର ପି.ମାଣିକାଣ୍ଟା ବୋଲି ସୂଚନା ମିଳିଛି । ସୂଚନା ଅନୁଯାୟୀ ଗତ ୨୮ ତାରିଖରେ ପି. ମାଣିକାଣ୍ଟାଙ୍କ ସହ ତିନି ଜଣ ଯୁବକ ବଲାଙ୍ଗୀର ଜିଲ୍ଲାକୁ ସିଜିଙ୍ଗ ଅଟୋ ଆଣିବା ପାଇଁ ଯାଇଥିଲେ । ସେମାନେ ପ୍ରାୟ ସବୁବେଳେ ଜବତ ଗାଡି ଗୁଡିକ ଆଣି ନବରଙ୍ଗପୁରରେ ତିଆରି କରି ବିକ୍ରି କରନ୍ତି । ଗତକାଲି ବଲାଙ୍ଗୀର ଜିଲ୍ଲାରେ ଦୁର୍ଘଟଣା ହେବା ପରେ ବଲାଙ୍ଗୀର ପୋଲିସ ସୂଚନା ନଦେଇ ଏମାନେ ନବରଙ୍ଗପୁରକୁ ଶବ ଧରି ଆସିଥିଲେ । ଆଜି ସକାଳୁ ନବରଙ୍ଗପୁର ଥାନାରେ ସୂଚନା ଦେବା ସହିତ ଦୁଇ ଜଣ ଯୁବକ ଆତ୍ମ ସମର୍ପଣ କରିଛନ୍ତି । ଘଟଣାର ଖବର ପାଇଁ ନବରଙ୍ଗପୁର ପୋଲିସ ପହଂଚି ତଦନ୍ତ କରୁଛି । ଶବ ବ୍ୟବଚ୍ଛେଦ ହେଲା ପରେ ପରିବାର ଲୋକଙ୍କୁ ହସ୍ତାରନ୍ତ କରାଯିବ ବୋଲି ପୋଲିସ ପକ୍ଷରୁ ସୂଚନା ମିଳିଛି । କେଉଁ କାରଣରୁ ଯୁବକଙ୍କ ମୃତ୍ୟୁ ହୋଇଛି ତାହା ନେଇ ପୁଲିସ ଖୋଳତାଡ ଆରମ୍ଭ କରିଛି ।
