ବୁରୋ: ଖୁବଶିଘ୍ର ପ୍ରେକ୍ଷାଳୟରେ ମୁକ୍ତିଲାଭ କରିବ ଚଳଚ୍ଚିତ୍ର ‘ମାଇଣ୍ଡ ଗେମ୍’। ମୁକ୍ତିଲାଭ ହେବାର ତାରିଖ ନିର୍ଦ୍ଧାରିତ ହୋଇନଥିବାବେଳେ ଅକ୍ଟୋବର ମାସରେ ଏହା ମୁକ୍ତିଲାଭ କରିବ ବୋଲି ଜଣାପଡିଛି । ଫିଲ୍ମରେ ମୁଖ୍ୟ ଚରିତ୍ରରେ ସମ୍ବଲପୁରର ମନୋଜ ମିଶ୍ର ଅଭିନୟ କରିଥିବା ବେଳେ ବଲିଉଡ୍ ଓ ଟଲିଉଡ୍ର ବହୁ ବିଶିଷ୍ଟ କଳାକାଳ ଅଭିନୟ କରିଛନ୍ତି। ବଲିଉଡ୍ର ଅତୁଲ କୁଲକର୍ଣ୍ଣି, ଯଶପାଲ ଶର୍ମା, ତନକିଲ୍ଲା ଭର୍ତ୍ତିଙ୍କ ସହିତ ଅନୁ ଚୌଧୁ ରୀ, ଚିନ୍ମୟ ମିଶ୍ର, ଅପ୍ସରା ରାଣୀ ପ୍ରମୁଖଙ୍କ ନିଖୁଣ ଅଭିନୟ ଫିଲ୍ମରେ ଦେଖିବାକୁ ମିଳିବ। ତେବେ ଶୁକ୍ରବାର ଅନୁଷ୍ଠିତ ସାମ୍ବାଦିକ ସମ୍ମିଳନୀରେ ଫିଲ୍ମର ପ୍ରଯୋଜକ ଶ୍ରୀଧର ମାର୍ଥା ଓ ମୁଖ୍ୟ ଅଭିନେତା ମନୋଜ ମିଶ୍ର କହିଛନ୍ତି ଖୁବ୍ ଶିଘ୍ର ସିନେମା ହଲରେ ଦର୍ଶକ ଏହାକୁ ଦେଖିପାରିବେ। ଫିଲ୍ମର ପ୍ରଯୋଜକ କହିଛନ୍ତି, ଫିଲ୍ମର ସବୁ କାମ ସରିସାରିଛି। ଫିଲ୍ମଟି ସମ୍ବଲପୁରୀ, ଓଡ଼ିଆ, ହିନ୍ଦୀ ଓ ତେଲୁଗୁ ଭାଷାରେ ମୁକ୍ତିଲାଭ କରିବ। ତେଲୁଗୁ ସିନେମାର ରାଷ୍ଟ୍ରୀୟ ପୁରସ୍କାର ପ୍ରାପ୍ତ ଆଗଧାଡ଼ିର ଜଣାଶୁଣା ନିର୍ଦ୍ଦେଶକ ରାଜେଶ ଟଚରିଭର୍ ଏହି ଫିଲ୍ମର ନିର୍ଦ୍ଦେଶନା ମଧ୍ୟ ଦେଇଛନ୍ତି।
ବଲାଙ୍ଗୀର ଜିଲ୍ଲା ପାଟଣାଗଡ଼ ପାର୍ସଲବୋମା ଘଟଣାରୁ ପ୍ରେରଣା ପାଇ ଏହି ଚଳଚ୍ଚିତ୍ର ନିର୍ମାଣ କରାଯାଇଥିବା କୁହାଯାଇଛି। ବିଭିନ୍ନ ମାମଲା ଓ ସମସ୍ୟା କାରଣରୁ ଫିଲ୍ମଟି ୫ ବର୍ଷ ପରେ ମୁକ୍ତିଲାଭ କରିବାକୁ ଯାଉଛି। କିଛି ମାସ ତଳେ ଫିଲ୍ମର ଟିଜର୍ ରିଲିଜ୍ ହୋଇଥିବା ବେଳେ ଦର୍ଶକଙ୍କ ଭଲପାଇବା ଦେଖିବାକୁ ମିଳିଛି। ସମ୍ବଲପୁରୀ ଭାଷାରେ ଏହାକୁ ମୁକ୍ତିଲାଭ କରାଇବା ଦ୍ବାରା ଆଗାମୀ ଦିନରେ ସମ୍ବଲପୁରୀ ଭାଷାରେ ଏଭଳି ଉଚ୍ଚମାନର ଚଳଚ୍ଚିତ୍ର ତିଆରି କରିବାକୁ ପ୍ରଯୋଜକ ଓ ନିର୍ଦ୍ଦେଶକମାନେ ଆଗଭର ହେବେ ବୋଲି ମନୋଜ ମିଶ୍ର କହିଛନ୍ତି।