ଭୁବନେଶ୍ୱର: ଆଜି ହେଉଛି ଅନ୍ତର୍ଜାତୀୟ ମହିଳା ଦିବସ। ମହିଳାମାନଙ୍କର ସଂଘର୍ଷ , ସାମାଜିକ , ଅର୍ଥନୈତିକ , ସାଂସ୍କୃତିକ ଓ ରାଜନୈତିକ ଉପଲବଧିକୁ ପାଳନ କରିବା ଏବଂ ତାଙ୍କ ଅଧିକାର, ସଫଳତାକୁ ଆଲୋକପାତ କରିବା ପାଇଁ ପ୍ରତି ବର୍ଷ ମାର୍ଚ୍ଚ ୮ ତାରିଖକୁ ସାରା ବିଶ୍ଵରେ ଅନ୍ତର୍ଜାତୀୟ ମହିଳା ଦିବସ ରୂପେ ପାଳନ କରାଯାଛି। ସମାଜରୁ ଲିଙ୍ଗଗତ ଭେଦଭାବ ଦୂର ଲାଗି ମଧ୍ୟ ଏହା ମାଧ୍ୟମରେ ସଚେତନତା ସୃଷ୍ଟି କରାଯାଇଥାଏ । ପ୍ରଥମେ ୧୯୦୯ ମସିହାରେ ଫେବ୍ରୁଆରି ୨୮ ତାରିଖକୁ ଅନ୍ତର୍ଜାତୀୟ ମହିଳା ଦିବସ ରୂପେ ପାଳନ କରାଯାଇଥିଲା। ପରେ ଜାତିସଂଘ ପକ୍ଷରୁ ୧୯୭୭ରେ ନିଷ୍ପତ୍ତି ନିଆଗଲା ଯେ, ମାର୍ଚ୍ଚ ୮ ରେ ପାଳନ କରାଯିବ ଅନ୍ତର୍ଜାତୀୟ ମହିଳା ଦିବସ।
ସମାଜରେ ମହିଳାଙ୍କ ଗୁରୁତ୍ଵ ଓ ସେମାନଙ୍କ ଭୂମିକାକୁ ସମ୍ମାନ ଜଣାଇବା ଉଦ୍ଦେଶ୍ୟରେ ଏହି ମହିଳା ଦିବସ ପାଳନ କରାଯାଉଛି। ପ୍ରତ୍ୟେକ କ୍ଷେତ୍ରରେ ମହିଳାଙ୍କର ବେଶ୍ ଗୁରୁତ୍ଵ ରହୁଛି। ସେ ବିଭିନ୍ନ ଭୂମିକାର ଅବତୀର୍ଣ୍ଣ। ମାଆଠାରୁ ଆରମ୍ଭ କରି ପତ୍ନୀ, ଭଉଣୀ, ବାନ୍ଧବୀ, ଝିଅ ଆଦି ସମସ୍ତ ଭୂମିକା ତୁଳାଇ ଆସୁଛନ୍ତି ମହିଳା। ଶୃଙ୍ଖଳିତ ଓ ବିକଶିତ ପରିବାର ଗଠନରେ ମଧ୍ୟ ନାରୀଙ୍କ ବେଶ୍ ପ୍ରମୁଖ ଭୂମିକା ରହୁଛି। ଏହାକୁ ସମ୍ମାନ ଜଣାଇ ପ୍ରତି ବର୍ଷ ମାର୍ଚ୍ଚ ୮ ତାରିଖକୁ ଅନ୍ତର୍ଜାତୀୟ ମହିଳା ଦିବସ ରୂପେ ପାଳନ କରାଯାଉଛି ।
